‘Shqipëria e Madhe’/ Haradinaj: I dukem i rrezikshëm Vuçiçit? Të njohë Kosovën

Lideri i Aleancës për Ardhmërinë e Kosovës (AAK), dhe kandidati për President, Ramush Haradinaj ka reaguar pas deklaratës së presidentit serb, Aleksandër Vuçiç se bashkimi i Kosovës me Shqipërinë është një rrezik.

Haradinaj shprehet se Vuçiç nuk ka pse të jetë nervoz, pasi Kosova po kërkon atë që i takon.

Sipas tij, nëse Vuçiç do që të shmangë referendumin për bashkim, atëherë Serbia duhet të njohë pavarësinë e Kosovës.

Postimi i Haradinajt në rrjetin social, Facebook

Për sa kohë i dukem i rrezikshëm Aleksandër Vuçiqit dhe Serbisë, jemi në rrugë të drejtë!

Mos keni frikë, z. Vuçiq. Nuk keni nevojë të jeni nervoz. Kosova vetëm po e kërkon atë që i takon.

Nëse ju dhe të tjerët dëshironi ta shmangni një referendum mbi bashkimin e Kosovës me Shqipërinë në vitin 2025, ka një mënyrë shumë të thjeshtë: Serbia ta njohë Kosovën si shtet të pavarur.

Tutje, Kosova e di rrugën e saj drejt anëtarësimit në NATO, BE dhe OKB. Me retorikë histerike nuk do të na ndaloni në të drejten tonë për të definuar të ardhmen e Kosovës.

Të gjithë duhet ta dinë që deklarata dhe betimi im për bashkim me Shqipërinë vjen si rezultat i neglizhencës së vazhdueshme të Brukselit në lidhje me Kosovën. Kosova dhe qytetarët e saj janë më pro-perëndimorët dhe si të tillë nuk e meritojnë të përbuzen, injorohen dhe kushtëzohen në pafundësi!