Ballkani Perëndimor pritet të ballafaqohet me sfida të mëdha, ndërsa shumë vende këtij rajoni shpejtojnë të ndërmarrin reforma integruese për qytetarët e tyre. Komisioneri Evropian për Zgjerim dhe Politikë Fqinjësore, Johannes Hahn është shprehur se ky vit do të jetë një vit kyç për rajonin e Ballkanit Perëndimor.
Me urimin për një vit të mbarë, ai kishte dhe një porosi për politikanët që të punojnë edhe më shumë për të ardhmen e vendeve që drejtojnë.
“Viti 2018 do të jetë kyç për Ballkanin Perëndimor dhe mundësi për bashkëpunim edhe më të afërt me të gjithë partnerët në sfidat e përbashkëta. Të gjithë partnerëve, politikanëve dhe qytetarëve u dëshiroj Vit të Ri të qetë dhe të gëzuar. Ta formojmë të ardhmen së bashku për rininë tonë”-thekson Johannes Hahn në rrjetin social Tëitter.
Ndërsa për shefen e politikës së jashtme të BE-së, Frederica Mogherinin, ky vit nuk do të jetë i lehtë për rajonin, por mbështetja e Bashkimit Evropian nuk do të mungojë asnjëherë.
“Ky nuk ishte një vit i lehtë për Ballkanin. Kam vizituar gjashtë kryeqytete të rajonit në një nga momentet më të vështira, në disa raste, koha e krizës së thellë politike. Rruga për reforma ka rifilluar (edhe pse ka ende shumë punë) dhe busulla e integrimit evropian po tregon rrugën. 2018 të jetë një vit vendimtar që kjo rrugë të forcohet dhe të bëhet e pakthyeshme” -ka përcjellë Mogherini.
Vendi ynë pret që gjysmën e parë të 2018-s, të hapë negociatat me unionin evropian dhe t’i bashkohet familjes së madhe, përmes reformave dhe përmirësimit të kushteve të jetesës.
