Mali i Zi, Shqipëria dhe Kosova kanë krijuar një qendër të përbashkët për bashkëpunim policor me qëllim përmirësimin e shkëmbimit të informacionit dhe rritjes së sigurisë së kufirit të përbashkët, në kuadër të arritjes së standardeve të Shengenit.
Protokolli për themelimin e Qendrës u nënshkrua në Plavë nga Ministrat e Brendshëm të Malit të Zi dhe Shqipërisë, Mevludin Nuhodžić dhe Dritan Demiraj, si dhe nga zëvendësministri i Punëve të Brendshme të Kosovës, Valdet Hoxha.
Siç njoftoi qevria e Malit të Zi, dokumenti do të kontribuojë në përmirësimin e bashkëpunimit ndërkufitar në luftën kundër krimit, përmes shkëmbimit më intensiv të informacioneve operative dhe koordinimin më efikas të aktiviteteve të përbashkëta përgjatë kufirit shtetëror, shkruajnë mediat malazeze, transmeton zeri.info.
Nuhodžić tha se qendra trepalëshe simbolizon angazhimin në luftën kundër krimit të organizuar transnacional dhe një kontribut të përbashkët për forcimin e sigurisë në rajon.
Valdet Hoxha tha se nënshkrimi i Protokollit trepalësh tregon një angazhim të tre vendeve për bashkëpunim të ndërsjellë dhe forcimin e mekanizmave ndërqeveritare në kontekstin rajonal të luftës së përbashkët kundër krimit të organizuar ndërkufitar, migracionit të paligjshëm dhe terrorizmit.
Ambasadori i Gjermanisë në Mal të Zi Hans Ginter Matern në emër të Qeverisë së Gjermanisë përgëzoi qeveritë e Malit të Zi, Shqipërisë dhe Kosovës për rezultatet e arritura dhe premtuese në drejtim të bashkëpunimit rajonal.
Ndërsa ambasadorja e SHBA-së në Mal të Zi, Margaret en Uehara, falënderoi palët në emër të qeverisë amerikane për kontributin e dhënë dhe bashkëpunimin në objektivat e përbashkëta, për realizimin e sistemeve të sigurta dhe efektive të kontrollit të kufirit.
