Një shpërthim i fuqishëm me tritol ka ndodhur rreth orës 02:30, në ambientet e një lokali në Radhimë të Vlorës.
Pronari i biznesit, i identifikuar si Sadrit Shabani është nga Elbasani dhe lokalin e kishte marrë me qira nga Gjik Novruzi.
Raportohet se lënda eksplozive është vendosur në lokalin “Odeon 2”, ndërsa katër punonjës të objektit kanë qenë duke fjetur brenda, por nuk kanë pësuar lëndime.
Shabani nuk është një emër i panjohur për policinë, pasi ishte DJ në lokalin “Univers” të fisit Çapaj dhe është kunati i Florenc Çelës. Në shkurt të 2022, Sadrit Shabani u mor në pyetje në lidhje me vrasjen e Gentian e Nezir Beqirit në vitin 2012.
Vlorë/Informacion paraprak
Më datë 19.05.2022, rreth orës 02:30, në fshatin Radhimë,Vlorë, në lokalin e shtetasit Gj. N., të marrë me qira nga shtetasi S. Sh., ka shpërthyer një sasi lënde, e dyshuar eksplozive, ku si pasojë ka vetëm dëme materiale. Grupi hetimor ndodhet në vendngjarje, dhe po punon për zbardhjen e rrethanave të ngjarjes.
