Të tjera detaje janë zbardhur lidhur me shpërthimin e ndodhur ditën e djeshme në zonën e ish-Bllokut në kryeqytet.
Deri më tani, duke iu referuar hetimeve, mendohet se shpërthimi ka ndodhur si pasojë e rrjedhjes së gazit në një argjendari, i provokuar më pas nga një shkëndijë elektrike, çka ka aktivizuar shpërthimin.
Sipas Inspektoratit Shtetëror Teknik Industrial, njëra prej bombolave ishte e mbushur me gazin propan, ndërsa tjetra me gazin kriogjen, i cili quhet ndryshe gaz teknik. Bombola e gazit kriogjen është gjetur me valvul të hapur dhe dyshohet se ka pasur rrjedhje në tubin përcjellës mes bombolës dhe pajisjes, me të cilën punohej.
Megjithatë, grupi hetimor po vazhdon hetimet për të dalë në një konkluzion përfundimtar në lidhje me ngjarjen, nga ku pesë persona mbetën të plagosur.
