Shtëpia e kreut të Federatës Shqiptare të Futbollit, Armand Duka, u sulmua me tritol të hënën në mbrëmje, por në një kohë të shkurtër policia ka vënë në pranga autorin e dyshuar të ngjarjes. Shpërthimi i fuqishëm me lëndë plasëse u regjistrua rreth orës 22:03 të mbrëmjes së të hënës, ndërsa gjatë ditës së djeshme në media dolën pamjet e kamerave që filmuan të gjithë skenën. Një numër i madh personash u shoqëruan menjëherë pas ngjarjes, dhe gjatë ditës së djeshme, ndërsa në orët e mbrëmjes është arritur të identifikohet falë pamjeve të kamerave edhe personi i dyshuar që vendosi lëndën plasëse në portën e vilës trekatëshe të kreut të FSHF-së. Bëhet fjalë për shtetasin Arlen Hasanajn, 34-vjeç, banues në të njëjtën lagje me Dukën.
I prangosuri, administrator i një biznesi në Durrës
Personi i arrestuar, Arlen Hasanaj, rezulton administrator i një biznesi në qytetin bregdetar dhe banon në një lagje me kreun e FSHF-së. Bëhet fjalë për një biznes që merret me import-eksport dhe tregtim me shumicë e pakicë të artikujve industrialë, në veçanti të atyre elektronikë, kondicionimi, materiale elektrike speciale, kompjuterike, telefonike, radiotelevizive, elektrike. Hasanaj ka lëvizur nga rruga e portit me një makinë tip “ML” dhe më pas ka shkuar në lagjen nr.4, atje ku banon edhe Duka. Dyshohet se i riu e ka marrë lëndën plasëse në një pallat pranë Lagjes nr.4, në të njëjtën zonë ku ka edhe biznesin.
Dyshimet e para
Dyshimet e para janë se ngjarja ka ardhur si pasojë e një konflikti për biznesin. Ndërkohë, pas sulmit në shtëpinë e tij, Armand Duka, presidenti i Federatës Shqiptare të Futbollit ka thënë se dëmet nga shpërthimi nuk kanë qenë të shumta, por ka thënë se ai gjithashtu është kërcënuar edhe me mesazh që i ka ardhur në telefonin e tij. Ky mesazh, sipas Dukës i ka ardhur pak ditë më parë dhe në të, atij i është kërkuar dorëheqja nga kreu i Federatës Shqiptare të Futbollit ose do të vritej. Duka ka thënë se përkundër që e ka marrë mesazhin kërcënues, nuk ka shkuar në polici për ta denoncuar. Ai gjithashtu ka shtuar se shpreson që ky shpërthim në shtëpinë e tij mos të ketë lidhje me konfliktin e Federatës Shqiptare të Futbollit me kryetarin e Bashkisë së Tiranës, Erion Veliajn. Ai tha se nuk ishte në shtëpi kur ndodhi shpërthimi i fuqishëm, në portën e shtëpisë së tij në Durrës.
