Një shpërthim me lënde plasëse ka ndodhur pasditen e sotme në Orikum të Vlorës. Një sasi eksplozivi është vendosur pranë derës së një apartamenti të një pallati.
Nga shpërthimi nuk ka të lënduar, por vetëm dëme materiale në derën e jashtme. Lënda plasëse dyshohet se është vendosur si formë kërcënimi për pronarin e banesës.
Mësohet se pronari i apartamentit është shtetasi i identifikuar si Artan Xhelilaj, ndërsa ky i fundit është shoqëruar për t’u marrë në pyetje.
”Më datë 12.04.2021, rreth orës 18:10, në Orikum, në pjesën e jashtme të banesës së shtetasit A.Xh, ka shpërthyer një sasi e vogël lëndë plasëse, ku si pasojë ka vetëm dëme të vogla materiale.”, informon policia.
Menjëherë në vendngjarje kanë shkuar forcat e Policisë dhe grupi hetimor ku vijon veprimet për sqarimin e rrethanave të ngjarjes, identifikimin dhe kapjen e autorit.
