Paraditen e sotme, policia njoftoi se do procedojë penalisht Robert Aliajn, si dhe 24 persona të tjerë, pasi kanë prishur rendin dhe qetësinë publike gjatë protestës së studentëve. Kjo masë e ndërmarrë nga ana e uniformave blu, ka sjellë edhe reagimin e Robert Aliaj, i cili e quan veprimin absurd. Po kështu ai ka nënvizuar faktin se nuk mbështet asnjë forcë politike, por e gjitha kjo bëhet për ti njollosur emrin.
“Ata që e kanë bërë këtë, duan të më vënë kundër shtetit. Është absurde, sepse unë kam qenë në fitness deri në orën 10:00, dhe më pas në shtëpi. Kjo bëhet për të destabilizuar çështjen e studentëve, dhe unë jam kundër politizimit të lëvizjes studentore.
Unë jam për studentët dhe kam bërë thirrje që ata të tregojnë dialog dhe vendosmëri. Me dialog nënkuptoj paqe. Unë nuk kam qenë fare në qendër dje. Duan të njollosin emrin. Unë nuk mbështes asnjë forcë politike”, ka thënë Robert Aliaj.
