Policia bën me dije se ka shoqëruar 50 drejtues mjetesh, pasi kanë dalë në rrugë me makinë.
Ata janë shoqëruar pasi nuk kanë respektuar urdhrin e qeverisë, për të mos dalë me makinë personale në rrugë deri në fund të fundjavës.
Policia ka bllokuar 32 makina në Durrës dhe u ka marrë dokumentet shoferëve të ‘pabindur’. Edhe në Vlorë ka pasur disa të ‘pa bindur’ që nuk kanë respektuar urdhrin e qeverisë për të mos qarkulluar me makina private. 6 drejtues automjetesh janë ndalur ditën e sotme në Vlorë. Atyre u është kërkuar që të parkojnë makinat dhe u merren çelësat e makinave.
Kryeministri Rama njoftoi ditën e djeshme se duke filluar nga ora 6 e mëngjesit të së premtes, e deri të dielën në mesnatë nuk do ketë qarkullim të makinave brenda dhe jashtë qyteteve.
Kreu i qeverisë bëri me dije se vetëm mjetet e transportit të mallrave, automjetet e mediave dhe mjetet për transportin e mjekëve dhe infermierëve do lejohen të qarkullojnë.
Tirana u zgjua si kurrë më parë sot, me rrugët pothuajse bosh dhe me shumë pak njerëz që lëviznin.
