Kryetari i shoqatës “Labëria”, profesor Ago Nezha, promovoi dje mes miqve dhe dashamirësve në ambientet e “Fundjavë Ndryshe”, librin e tij ku tregon përmes refleksionesh rolin madhor që ka luajtur gjatë këtyre 30 viteve ku ka mbajtur lartë atdhetarinë, frymën e unitetit kombëtar si dhe ka punuar për ruajtjen dhe pasurimin e traditave, zakoneve, kulturës dhe folklorit të trevës së Labërisë.
Në kuadrin e 30 vjetorit të krijimit të Shoqatës Atdhetare Kulturore Labëria “Nderi i Kombit”, kryetari i shoqatës dhe njëherazi poeti, publicisti dhe shkrimtari Ago Nezha, erdhi me një botim që titullohet: “Shoqata Atdhetare Kulturore Labëria 30 vjet jetë dhe aktivitet”.
Ky libër është një traktat që përshkruan jo vetëm veprimtarinë e Shoqatës Labëria në hapësirën 30 vjeçare, por jep një historik të shtrirë në kohë dhe hapësirë për trevën e Labërisë në luftërat për liri, pavarësi, çlirim kombëtar dhe shoqëror, në rrjedhën e lashtësisë nga autorë vendas dhe të huaj.
Kryetari Nezha ka mbajtur një qëndrim kritik sa i takon fenomenit të asimilimit të gjuhës shqipe, apo vendosjes së emrave të huaj.
“Sot Labëria ka aktivitet të dendur nga pikëpamja atdhetare, po na asimilohet gjuha. Ka edhe tendencë këtu të ndryshojnë emrat”, tha Nezha.
Në këtë libër janë përfshirë veprimtaritë kryesore me karakter kombëtar e ndërkombëtar, në dimensionet e mundshme të përfaqësimit. Shoqata Labëria ka një galeri të pasur aktivitetesh në qendër dhe në degët e rretheve.
Në ambientet e “Fundjavë Ndryshe”, autori Nezha promovoi edhe librin me poezi “Hënë e verbuar”.
“Hëna e verbuar është metaforë, këto që ndodhin nuk jemi aty ku duhet të ishim. Hëna do të çeli rrugën me ndriçimin e saj”, tha Nezha.
Shoqata Atdhetare Kulturore Labëria, e vlerësuar me titullin “Nderi i Kombit”, tregon vëmendje duke zhvilluar aktivitete patriotiko-kulturore në degët e saj në rrethe si dhe në mbarë hapësirën shqiptare.
Në këtë promovim merrnin pjesë, ish-Presidenti Bamir Topi, Kryegjyshi Botëror Baba Mondi, Prof. Ethem Ruka, Prof, Fatos Klosi, Prof. Rexhep Uka, Prof. Bardhosh Gaçe, konstitucionalisti Shkëlqim Hajdari, Ahmet Demaj, deputeti Vullnet Sina, “Mjeshtri i Madh” Gëzim Tushi, poetë, shkrimtarë, gazetarë, anëtarë të Shoqatës Labëria, miq të librit, etj.
Në 21 dhjetor 2015, në një ceremoni solemne, Bujar Nishani vlerësoi me Dekoratën “Nderi i Kombit”, në 24-vjetorin e themelimit të saj Shoqatën Kulturore Atdhetare “Labëria” “Për ndjenjën e lartë patriotike, për forcimin e unitetit kombëtar dhe frymën e solidaritetit dhe harmonisë pa dallime partiake, për forcimin dhe përparimin e demokracisë, si dhe për ruajtjen e pasurimin e traditave, zakoneve, kulturës dhe folklorit të trevës së Labërisë”.
