Gjatë marrjes në pyetje pas shoqërimit në Policinë e Durrësit, administratori i firmës, Edi Lika, i cili ka kryer transportin e makinave ku ishin fshehur paratë, është shprehur se nuk kishte asnjë dijeni për prezencën e shumës së eurove të gjetura brenda tyre.
“Nuk kam asnjë lidhje dhe dijeni për paratë, kam kryer thjesht transportin. Ishim kontraktuar nga biznesmenë kundrejt pagesës për të bërë transportin”, mësohet të jetë shprehur Lika.
Po kështu ai ka thënë se makinat po i transportonte për llogari të një biznesmeni, por pa dhënë emrin e tij. Ende mbetet mister se cili ka qenë biznesmeni nga Kosova, që ka porositur 9 makinat, 7 prej të cilave “Toyota Yaris”.
Përveç administratorit, policia ka shoqëruar dhe dy shoferët e trajlerit, Klevis Lika, 19-vjeç, i cili është dhe djali i pronarit të firmës dhe Agim Ceka, 61-vjeç.
Ata kanë deklaruar në polici se nuk kanë lidhje me shumën e eurove, pasi kanë kryer thjesht transportin e makinave, siç edhe kanë bërë në shumë raste të tjera. 19-vjeçari Lika rezulton se ka kryer një itinerar të tillë të paktën 4 herë nga periudha shkurt-qershor, për të transportuar makina nga Italia për në Shqipëri.
Kurse 61-vjeçari, nga verifikimi në sistemin TIMS, rezulton se ka kryer një proces të tillë dy herë. Policia po vijon hetimet për të zbuluar biznesmenin. Ndërkohë që makinat dhe shuma e eurove janë sekuestruar nga Prokuroria për llogari të hetimeve. (Burimi: Panorama)
