Ndryshe nga hera që shkoi, në sesionin e kaluar parlamentar, ku nuk pranoi të votojë publikisht ligjin për shembjen e teatrit, një nga eksponentët kryesore të Partisë Socialiste, Pandeli Majko, këtë herë me mjaft diplomaci ka ndryshuar taktikë.
Duke shmangur akuzat dhe kundër akundër, Majko ka shfrytëzuar një ftesë, për të mos qenë në Tiranë. Ai i është bashkëngjitur Ilir Metës për të shkuar drejt Kosovës. Majko nuk ndryshoi qëndrim as në debatin e fundit të zhvilluar para kamerave me kryeministrin Rama, kur ky i fundit i kërkoi ta votonte në Kuvend. Majko braktisi seancën në shenjë demonstrative, duke sjellë mjaft diskutime ne media e më gjërë, mbi marrëdhënien e tyre.
Me rikthimin e ligjit në Kuvend, Majko zgjodhi një tjetër rrugë, për të shmangur hatërmbetjet. Ai nuk ishte në Kuvend për tu vënë në siklet, por shfrytëzoi një ftesë për të shkuar në Drenas të Kosovës, ku po përurohen shtatoret e luftëtarëve Fehmi e Xhevë Lladrovci.
