Automjeti i një punonjësi policie në Vlorë është përfshirë nga flakët në orët e para të mëngjesit.
Mësohet se automjeti tip Benz me targa VL 4929 B i përket Dhimo Nurajt, punonjës policie me funksion ndihmës/specialist zone në Komisariatin e Policisë Vlorë.
Ka qenë vetë polici ai që ka njoftuar për zjarrin, teksa ka parë makinën e tij të shkrumbuar, përpara shesh-pushimit të pallatit.
Nga të dhënat e para dyshohet se zjarrvënia është e qëllimshme, ndërsa grupi hetimor po vijon punën për përcaktimin e shkakut të rënies së flakëve të zjarrit në automjet.
Pista e parë ku po hetohet është djegia e makinës për shkak të detyrës.
