Kryetari aktual i Partisë Demokratike(por me funksione organizative të ngrira), Lulzim Basha ka zyrtarizuar kandidaturën e tij për të drejtuar këtë force politike në katër vitet e ardhshme.
Në përfundim të afatit të vendosur nga urdhri i Edmond Spahos dhe Edi Palokës për zhvillimin e zgjedhjeve, do të jenë pesë kandidatet që do të garojnë për kreun e PD-së, raporton Panorama.
I pari që zyrtarizoi kandidaturën ishte ish-kryetari i PD-së, Eduard Selami i cili deklaroi vendimin e marrë për të qenë pjesë e garës për PD , duke bërë edhe procesin e regjistrimit në garë.
Pas Selamit, një tjetër demokrat Astrit Sinanaj, anëtar i PD në qytetin e Fierit, njoftoi në faqen e tij në rrjetin social “Facebook” se do të garonte për PD-në. Ky ishte kandidati i trete zyrtar i regjistruar, si pjesë e garës për të marrë kreun e PD-së.
Kandidati i tretë zyrtar në garë është Erion Piciri, i cili dje njoftoi zyrtarisht se ka shpallur kandidaturën për kreun e PD-së dhe bashkë me këtë ka bërë edhe regjistrimin.
Po dje, demokrati Astrit Patozi deklaroi zyrtarisht me një dalje nga selia blu shpalljen e kandidaturës për kreun e PD-së dhe sfidoi haptazi kryedemokratin aktual, Lulzim Basha duke i thënë se është gati të përballet me të në një garë të barabartë.
Ish-nënkryetari numëroi edhe kushtet për Bashën dhe garën në PD, duke kërkuar njëherësh si domosdoshmëri shtyrjen e datës se caktuar për mbajtjen e zgjedhjeve.
Sipas vendimit të PD-së, zgjedhjet sipas parimit ‘një anëtar, një votë’ do të mbahen në 22 korrik.
