Kryeministri Edi Rama ka vizituar ditën sotme qytetin e Laçit, ku ka parë nga afër dëmet që shkaktoi tërmeti i 26 nëntorit.
Kreu i qeverisë është ndaluar në spitalin e këtij qyteti pasi godina ka pësuar dëmtime. Gjatë bashkëbisedimit me banorët, kryeministri u shpreh se është rasti që qyteti i Laçit të rilindë. Ndërsa shtoi se spitali i ri do të ndërtohet me të gjitha parametrat e duhura, e do të jetë gati brenda 6 muajve të parë të vitit tjetër.
Në një moment, Rama iu ka kërkuar banorëve që të mos tentojnë të futen a të qëndrojnë në banesat e tyre nëse janë shpallur të pabanueshme. Por iu bëri thirrje që të aplikojnë për të marrë bonusin e qirasë.
“Të merrni bonusin e qirasë dhe të shkoni atje, e mos rrini aty, hajt se ju nxjerrim ne mos ki merak. Muhabet kot. Shkoni merrni policinë e nxirrini jashtë”, tha Rama.
Nuk kanë munguar batutat për burrat dhe gratë, teksa ka inspektuar godinën ku është zhvendosur spitali i Laçit.
“Faleminderit për të gjithë punën dhe sakrificat. Ky është spital partizan për momentin. Do ta kalojmë këtë fazë kështu por ne shumë shpejt do ndërtojmë spitalin e ri. Kemi bërë gjithë përgatitjet për të filluar projektin. Do ta bëjmë shumë më mirë se ai që është. Optimal për ju që të jetë në lartësinë tuaj spitali. Jeni super gra dhe vajza, ju e mbani në këmbë dinjitetin e Laçit. Se burrat janë një çik, e keni parasysh apo jo drejtor. I shaj, sa kam akoma po nuk i them”, deklaroi Rama.
