Kreu i Kadastrës, Artan Lame ka garantuar të gjithë qytetarët se prona e tyre, kushdo që e ka me letra dhe me djersë është e sigurtë. Ky reagim pason pasi më herët ai ka deklaruar se Kadastra është një nga institucionet i vënë në shënjestër që ka korrupsion që në gjitha hallkat e saj, mirëpo me procesin e dixhitalizimit, ky fenomen do zhduket. Ndër të tjera, Artan Lame ka paralajmëruar se “furtuna sapo ka filluar” për të gjithë ata që kanë vendosur duart në regjistrat e pronave. Po kështu u shpreh i bindur se “Prokuroria do t’i hyjë me themel kësaj çështje” dhe do jetë një kalvar dhe proces i gjatë kontrolli për ta.
“Dua të garantoj të gjithë qytetarët se prona e tyre, kushdo që e ka me letra dhe me djersë është e sigurt. Mos dëgjoni broçkullat poshtë e përjetë, jo i dogji, jo ngrihet natën, jo shkon Lamja natën djeg regjistrat.
Prona e qytetarëve është e sigurt, unë dola në televizor dhe inventari është bërë pikërisht për këtë gjë. Është vënë një ditë zero, nga këtej nuk ndodh më asgjë, Prokuroria të vijë e të kontrollojë çfarë është bërë nga kjo ditë e më përpara, neve garantojmë që me pronën nuk luhet më.
Ama të gjithë ata që kanë vendosur dorë mbi ato arkiva, të gjitha organizmat zyrtare të këtij shteti kanë të drejtën e Zotit të vijnë dhe ti kontrollojnë, e të kërkojnë llogari. Rrini të qetë për pronën tuaj të ligjshme, jam i bindur që Prokuroria do i hyjë me themel dhe ta vazhdojë këtë hetim. Por unë besoj, s’më takon mua se nuk bëj parashikime të paprovuara, do jetë një histori shumë e gjatë, një furtunë që sapo ka fillua. Furtuna e kontrollit se çfarë është bërë në vite dhe dekada me regjistrat e pronave. Do jetë një kalvar i gjatë dhe një proces i gjatë kontrolli për ta”.
