Diego Armando Maradona vetëm pak ditë më parë tronditi opinionin sportiv me deklaratën e tij për Lionel Messin. Ai u shpreh se ylli i Barcelonës nuk ishte kurrë një lider në kombëtare, duke e përforcuar më shumë me faktin se nëse ai do të ishte edhe njëherë trajner nuk do ta grumbullonte fare.
“Është e kotë që ta marrim më në konsideratë si lider të Argjentinës një njeri që shkon 20 herë në banjo para ndeshjes. Messi është Messi kur luan me Barcelonën, por nuk është i njëjti, kur luan me Argjentinën. Nëse do të isha trajneri i Kombëtares, nuk do ta ftoja më atë.”-është shprehur Maradona.
Nuk kanë qenë të pakët figurat që kanë reaguar pas kësaj deklarate. Mario Cempes, një tjetër legjendë e Argjentinës, është shprehur se Maradona nuk e di se çfarë flet, ai është dikush që krijon gjithmonë probleme.
Reagimet e forta nuk kanë rënë në vesh të shurdhët, pasi “dora e zotit” është detyruar t’I japë sqarime Messi-t. Përfaqësuesi ligjor I legjendës argjentinase, Matias Morla, në një prononcim për mediat është shprehur: “Ai nuk ka dashur të sulmojë Messin, por të evidentojë faktin që ndaj tij po ushtrohet shumë presion, ndaj edhe ka folur në atë mënyrë. Gjithsesi tashmë është ndjerë shumë keq që kjo është interpretuar në këtë mënyrë, ndaj do të telefonojë Messin, për t’i kërkuar falje”.
