Në mitingun e mbajtur sot nga Partia Demokratike në Shkodër nuk ka pasur vetëm përkrahës të kryetarit Basha por dhe të atyre që ky i fundit nuk i ka kandiduar sërish për deputet. Gjatë fjalimit të kryetarit të Partisë Demokratike, Lulzim Basha, në Shkodër janë parë pankarta dhe postera me foton e Jozefian Topallit që qarkullonin në miting. Basha i është përgjigjur shkodranëve se e ka nisur fushatën elektorale të partisë që drejton me vendimin e duhur për ekipin e republikës së re. Ai ka falënderuar ish-deputetë të PD-së për qarkun e Shkodrës duke e filluar me Jozefina Topallin dhe vazhdon me Helidon Bushatin.
“Për herë të parë e gjithë opozita është e bashkuar në siglën e partisë demokratike. Qeveria flet për timonat, kush e ka dhe kush e drejton, por vetëm për qytetarët nuk flasin. Ata vijnë në këtë fushatë pa bilanc të 4 viteve të qeverisë. Ata janë të përçarë. Ne jemi të bashkuar. Unë e kam nisur me vendimin e duhur për ekipin e republikës. Falënderojmë shumë ata që kanë kontribuar për Partinë Demokratike për këto 27 vite. Falënderoj Jozefina Topallin dhe Helidon Bushatin dhe të tjerët”, thotë Basha.
Duhet theksuar se Topalli dhe Bushati ishin dy nga ish-deputete e PD-së që kundërshtuan listat e kandidatëve për deputet të PD-së që u hartuan nga kryetari Basha.
