Shkon në 50 numri i nxënësve të shkollës “Adem Haxhia” që u helmuan në Postribë të Shkodrës.
Prindërit hedhin akuza se fëmijët e tyre janë helmuar për shkak të ushqimit që kanë konsumuar gjatë pushimit të madh në një ‘Fast-Food’ që ndodhet pranë shkollës. Nga ana tjetër, Drejtoria e Shëndetit Publik dyshon se kjo situatë mund të jetë shkaktuar edhe nga uji.
Disa nxënës janë rikthyer në spital, për shkak të përkeqësimit të gjendjes shëndetësore, siç shihet edhe në foton e siguruar nga “Dosja.al”.
“Spitali Rajonal Shkodër bën me dije se lidhur me ngjarjen e ndodhur mbrëmjen e së enjtes, ku janë paraqitur në Urgjencë 26 nxënës nga shkolla e mesme e bashkuar Postribë me simptoma të tilla si të vjella, temperaturë, marrje mendsh. Të gjithë nxënësit kanë marrë trajtimin e menjëhershëm mjekësor në Spitalin Rajonal të Shkodrës. Në total janë paraqitur 26 raste nga ku 16 raste janë trajtuar në repartin infektiv dhe 10 raste janë trajtuar në repartin e pediatrisë.
Aktualisht 7 persona po marrin akoma shërbim në spital, 5 persona tek reparti i infektivit dhe 2 në pediatri, pjesa tjetër kanë lënë spitalin. Pacientët janë nën monitorimin e vazhdueshëm të mjekëve, duke ndjekur mjekimet e rekomanduara”, thuhet në reagimin e Spitalit Rajonal Shkodër.
