Një studente në Fakultetin Juridik ka dëshmuar para kamerave për ngacmimet seksuale që një polic bënte ndaj studenteve. Rasti u publikua nga ish-kryeministri Berisha, e më pas ka pasur reagim nga policia, teksa personi i akuzuar u shoqërua nga efektivët.
Megjithatë, në dëshminë e studentes, thuhet se shoqërimi nuk është bërë në mënyrë korrekte por me favorizim, teksa policit civil nuk i janë vënë pranga dhe nuk i është marrë as arma që ai dispononte.
Po ashtu, studentja ka rrëfyer se ngjarja ka ndodhur në tualetet e fakultetit, në kat të pestë të godinës. Sipas saj, polici kishte ngacmuar seksualisht studente dhe një profesoreshë, sjellje kjo që vijonte prej 2 muajsh.
“Unë isha aty, dhe aty na e ndihmuan djemtë. Ai thjesht na devijoi nga lavamanet dhe na futi në pjesën e meshkujve pasi tualetet janë të përbashkët”, tha ndër të tjera studentja.
