Policia e Shkodrës ka bërë të mundur identifikimin e autorit të plagosjes së 28-vjeçarit Edis Reçaj. Pas deklarimeve te 28-vjeçarit, por edhe kqyrjes së kamerave të sigurisë në bizneset e zonës, policia ka bërë të mundur identifikimin e autorit, megjithatë emri i tij nuk është bërë publik për arsye hetimore.
Mësohet se autori dhe i plagosuri kanë qenë në një automjet kur është plagosur në këmbë. Nga burime policore bëjnë me dije se pasi e ka plagosur në këmbë (në gjurin e majtë), i dëmtuari ka dalë nga mjeti dhe ka qenë vëllai i 28-vjeçarit që e ka çuar në spital. Reçaj ndodhet jashtë rrezikut për jetën. Policia ka nisur hetimet për zbardhjen e kësaj ngjarje.
Dëshmia e të plagosurit
I riu i cili mori një plumb në këmbë, në dëshminë e tij për policinë vendore të Shkodrës ka deklaruar se nuk e ka idenë se kush është autori i kësaj ngjarje.
Ai ka dëshmuar vetëm se “një person me kapuç të zi në kokë më ka ardhur nga mbrapa dhe më ka plagosur në këmbë, dhe është larguar me shpejtësi. Nuk e kam idenë se kush është autori që më plagosi. Nuk kam patur konflikte apo probleme me ndonjë person, ndaj edhe nuk e di arsyen e kësaj ngjarje”.
Kështu mësohet të ketë deklaruar para hetuesve i plagosuri, nga ambientet e spitalit.
Pavarësisht kësaj dëshmie, policia e Shkodrës ka dyshime se Edis Reçaj është në dijeni të autorit të plagosjes, por nuk ka dhënë asnjë emër për faktin se autori mund të jetë një i njohur i 28-vjeçarit.
