OSHEE ka reaguar në lidhje me lajmet që kanë qarkulluar për ndërprerje të energjisë elektrike gjatë koncertit të Noizyt në Sheshin “Nënë Tereza”, duke bërë me dije se ka rënë automati. Në njoftimin për media sqarohet se shkaku nuk ka qenë rrjeti elektrik, por nga pajisjet brenda regjisë, të cilat menaxhohet nga organizatorët. Ngarkesa e madhe e pajisjeve në koncert, ka sjellë edhe rënien e automatit.
“Shkaku nuk ishte rrjeti ynë elektrik, por nga pajisjet brenda regjisë, të cilat menaxhohen nga organizatorët. Ngarkesa e madhe e pajisjeve në koncert solli rënien e automatit, duke sjellë stakim të ndriçimit të një pjese të skenës, e cila menaxhohej nga organizatorët privatë”, njoftoi OSHEE.
Ndër të tjera sqaron se fiderat që furnizojnë rrjetin e shpërndarjes, kanë qenë të gjitha në punë dhe kabinat me tension. Energjia elektrike është shkëputur për disa minuta në koncertin “The Alpha Show” të reperit Rigels Rajku, i njohur si Noizy.
Kjo ka bërë që të ndërpritet muzika dhe performanca e këngëtarëve të ftuar, dhe ka sjellë pakënaqësi tek njerëzit që kanë blerë biletat për të ndjekur koncertin. Më pas, energjia është rikthyer dhe turma është qetësuar.
