Presidenti i Serbisë Aleksandar Vuçiç raportohet se ka shkelur rregullin kryesor të vendosur nga qeveria serbe për parandalimin e përhapjes së koronavirusit.
Më 22 mars Vuçiç ishte në një vizitë në Hungari, ndërkohë pasi është kthyer në Serbi nuk ka zbatuar rregullin e vetëizolimit për 14 ditë.
Qendra e Toplicës për Demokraci dhe të Drejtat e Njeriut ka ngritur një padi penale ndaj Vuçiç dhe një ministri të tij: “Propozojmë që këta persona të dënohen me dënim maksimal me burg në kohëzgjatje prej 3 vjetëve, pasi bëhet fjalë për persona të cilët nëpërmes të mjetive të informimit publik i tregojnë qytetarëve se nuk po i përmbahen masave të izolimit e me këtë edhe po i shkelin këto masa”.
Kujtojmë se Serbia ashtu si shumë shtete të tjera në botë, ka marrë masa shtrënguese ndaj koronavirusit.
Vuçiç ka njoftuar se të gjitha vendkalimet kufitare në Serbi – rrugore dhe hekurudhore, janë mbyllur në mënyrë që të parandalohet përhapja e COVID-19.
“Ne presim një rritje të numrit të të infektuarve në ditët në vijim”, tha para pak ditësh Presidenti, duke shtuar se Klinika e Sëmundjeve Infektive në Beograd është pothuajse e mbushur me pacientë.
