KPA ka shkarkuar nga detyra gjyqtarin Luan Daci. “Natyra dhe rrethanat e kryerjes së shkeljes disiplinore, klasifikohet ndër më të rënda dhe e bën të papërshtatshëm për kryerjen e detyrës së gjyqtarit të këtij institucioni. Ndaj Kolegji vendosi shkarkimin nga detyra”, thuhet në vendimin e KPA, marrë ditën e sotme.
Daci është i dënuar me vendim të formës së prerë nga Gjykata e Apelit Kundër Korrupsionit dhe Krimit të Organizuar, për “falsifikim dokumentash”. Ai nuk ka treguar shkarkimin nga detyra në vitin ’97, por ka deklaruar në kohën që tentoi dhe arriti të bëhej anëtar i KPA-së, se është larguar me dorëheqje, dhe për këtë arsye është cilësuar fajtor nga gjykata.
Pas vendimit në fjalë, ka ardhur edhe një reagim nga ana e tij. Ai ka thënë se anëtarët e këtij institucioni kanë shkelur dy Kushtetuta për vendimin e dhënë. Luan Daci nuk do e lërë me kaq, pasi do të drejtohet deri në Gjykatën e Strasburgut.
“Sot, KPA shkeli të dy Kushtetutat. Shkeli Kushtetutat dhe shkoi në ligjin magjistratë. Kushtetuta jonë është aneks. Ju jeni të interesuar për prishjen e vendimit të Strasburg, e Luan Daci do i fitojë të gjitha të drejtat. Do i drejtohem Strasburgut. Do të bëj gjithçka që të kthejmë në Shqipëri shtetin ligjor. Sot e theksoj, janë shkelur dy Kushtetuta. Është shumë e rëndë, që ta shkelë një dhomë gjykimi i një nivelit të lartë. E drejta vonon, por nuk harron”, tha Daci.
