Avokati Spartak Ngjela, teksa foli për shkarkimin e kreut të Gjykatës së Lartë, Xhezair Zaganjori, u shpreh se Shqipëria është një shtet i grabitur mes politikës dhe drejtësisë.
I ftuar në studion e lajmeve në “RTV Ora”, Ngjela nënvizoi se një shtet i pakontrolluar dhe një bankë e pakontrolluar vidhen, ndërsa e konsideroi gjendjen në të cilën ndodhet vendi një banditizëm, për të cilin shprehet se nuk është parë ndonjëherë.
“E rëndë është, por kështu kanë qenë të gjithë. Një shtet i pakontrolluar dhe një bankë e pakontrolluar vidhen. Ky ishte një shtet që është grabitur midis politikës edhe drejtësisë. Pushteti gjyqësor nuk prekte gjyqësorin. Njëri shiste drejtësinë, tjetri vidhte popullin. Do vijë e kundërta, piramida ishte kështu do kthehet kështu. Nëse nuk ka pushtet të pavarur dhe të rreptë, shteti vidhet. Kjo që ka ndodhur në Shqipëri është një banditizëm i paparë ndonjëherë”, deklaroi Ngjela.
