Koordinatori për Çështjet e Jashtme në Parlamentin Europian, Cristian Preda ka kritikuar kryeministrin Rama, të cilin e quajti një ‘kryeministër optimist tragjik’.
Duke folur në konferencën e delegacionit të Parlamentit Evropian, Preda tha se Rama kërkon çeljen e negociatave në qershor, por fillimisht ai duhet që të ulet me opozitën për krizën politike në vend.
“Është e rëndësishme që shqiptarët të flasin me njëri-tjetrin. E ftoj kryeministrin të ulet me opozitën”, tha Preda ndërsa dënoi pushimet nga puna si rrjedhojë e protestës studentore.
“Ju keni patur këtu protesta masive nga të rinj, është e papranueshme që atyre dhe familjarëve të tyre t’u bëhet presion, i kërkoj autoriteteve të ndalojnë presionet. Disa njerëz janë hequr nga puna se protestuan. E treta: liria e shtypit, këtu lajmet e rreme vijnë nga qeveria dhe partitë në opozitë, liria e shtypit është thelbësore”, tha ndër të tjera Preda.
