Pas “shkrirjes” së Drejtorisë së Policisë së Elbasanit, gazetari investigativ Artan Hoxha ka paralajmëruar lëvizje të tjera në Policinë e Shtetit.
Në një lidhje telefonike për Neës 24, Hoxha tha se janë rihapur dosjet e SHISH për implikimin e policëve dhe mund të ketë urdhër-arreste nga Prokuroria. Po ashtu, gazetari investigativ shtoi se e njëjta gjë mund të ndodhë edhe në Policinë e Lushnjes dhe Vlorës, si pasojë e ngjarjeve të fundit.
“Janë rihapur të gjitha dosjet dhe materialet e dërguara nga SHISH për implikimin e drejtuesve të lartë të policisë dhe pritet edhe reagim i prokurorisë. Nuk përjashtohet lëshimi i urdhër-arresteve për drejtues të Policisë së Shtetit.
Veprim që pritej për Elbasanin. E kam deklaruar që do shkrihej gjithë struktura e policisë së Elbasanit. Përgjegjësia nuk është në grup por ka edhe individuale. Ishte një masë që pritej edhe për shkak të hetimeve të brendshme.
Struktura e Brendshme e policisë që heton aktivitetin dhe veprimtarinë e strukturave të Policisë po ndjekin të njëjtën procedurë edhe në Lushnjë edhe në Vlorë, në ditët në vijim do kemi një reagim edhe për këtë situatë, pas ngjarjeve të rënda si ajo që ndodhi në Lushnjë dhe ajo në Vlorë përfshirë edhe operacionin e mbrëmshëm”, tha Hoxha.
Lushnja u trondit më 11 tetor, ku mbetën të vrarë dy të rinj dhe dy persona u plagosën pak metra larg Komisariatit të Policisë, ndërsa dy persona u plagosën më 1 tetor në Vlorë në një atentat me armë zjarri që ndodhi në rrugën Tranballkanike.
