Situata e rëndë e krijuar nga koronavirusi, ka bërë që guvernatori i New York, Andrew Cuomo të zgjasë edhe më shumë izolimin e vendit.
Sipas mediave të huaja, New York do të qëndrojë i mbyllur deri të paktën më 15 maj, për të frenuar përhapjen e COVID-19.
“Punonjësit jothelbësorë duhet të vazhdojnë të qëndrojnë në shtëpi. Rregullat e distancës sociale mbeten”, shkruan Cuomo në postimin e tij në Twitter.
Ndërkohë gjatë një konference për shtyp, guvernatori tha se falë politikave për distancën sociale, vendi po përparon në përmbajtjen e përhapjes së virusit.
“Ne e kemi nën kontroll këtë bishë. Ne e kemi ulur shkallën e përhapjes”, tha Cuomo.
I pyetur se çfarë do të ndodhë pas datës 15 maj, Cuomo tha: “Çfarë ndodh pas kësaj? Unë nuk e di. Ne do të shohim në varësi të asaj që tregojnë të dhënat”.
New York është vendi më i prekur nga koronavirusi në Shtetet e Bashkuara të Amerikës. Ai numëron mbi 226 mijë raste infektimi dhe mbi 16 mijë viktima.
Në raport global, SHBA mbetet vendi më i prekur nga COVID-19, teksa numëron 668,174 raste infektimi dhe rreth 34 mijë viktima.
Më shumë se 2,1 milionë njerëz nga e gjithë bota janë prekur nga koronavirusi, ndërsa 144,341 persona kanë humbur jetën.
