Rritet numri i vdekshmërisë foshnjore në vend. Sipas statistikave të nxjerra nga INSTAT, vitin e kaluar vdiqën rreth 9 foshnje në 1000 lindje të gjalla.
Një arsye madhore që ka ndikuar në këto shifra sipas INSTAT është edhe fakti që numri i lindjeve në Shqipëri po ulet.
“Rritja e koeficientit të vdekshmërisë foshnjore i dedikohet uljes së numrit të lindjeve në vitin 2018 prej 6,3 % krahasuar me vitin 2017”.
Krahasuar me vitin 2017, ku në 1000 lindje të gjalla, 8 foshnje vdiqën, numri i bebeve të lindura për vitin 2018 është 6% më e vogël.
Gjatë vitit të kaluar kanë lindur gjithsej 28,934 bebe, nga këto kanë humbur jetën 257 foshnja.
Sipas INSTAT janë disa faktorë të rëndësishëm që çojnë në vdekjen e fëmijëve nën 1 vjeç. Barrën më të madhe e mbajnë “sëmundjet që shfaqen në periudhën e rreth lindjes” me 42,0 % dhe pas saj vijnë “ndërlikimet në barrë të lindjes dhe të periudhës së paslindjes”, të cilat shkaktojnë rreth 27,2% të vdekjeve.
Shifrat tregojnë që më problematike në këtë drejtim janë Maqedonia me 13.7 vdekje për 1 mijë fëmijë, Serbia dhe Bosnja e Hercegovina me 5.7 vdekje për 1 mijë fëmijë, kjo sipas të dhënave të nxjerra nga Banka Botërore.
Mali i Zi mbetet shteti me nivelin më të ulët të vdekshmërisë në rajon, me 3.5 fëmijë për 1000 lindje të gjalla.
