Në vitin 2017-të ka pasur një rënie të numrit të aksidenteve automobilistike në vend. Instituti i Statistikave ka publikuar raportin “Aksidentet Rrugore”, ku shifrat flasin për një numër të reduktuar aksidentesh krahasuar me vitin 2016-të.
Në vitin 2017, numri i aksidenteve në të gjithë Shqipërinë është 1.978, krahasuar me vitin 2016 është ulur 2,7 %. Gjatë periudhës Janar-Dhjetor 2017, pra gjatë gjithë vitit të kaluar, në Tiranë janë shënuar 783 aksidente dhe 54 viktima. Në vitin 2017, numri i personave të plagosur nga aksidentet rrugore është 2.389.
Kështu, Tirana është qyteti me numrin më të lartë të aksidenteve rrugore, duke pasuar me qytetin e Durrësit, ku gjatë 2017-ës janë shënuar 256 aksidente, për të vijuar më pas me Lezhën, me 188 aksidente.
Viktimat nga aksidentet
Gjatë 2017-ës, në Shqipëri janë regjistruar në total 222 viktima nga aksidentet, numri më i lartë i të cilëve shënohet në kryeqytet (54 viktima), për të vijuar më pas me Fierin, ku shënohen 29 viktima gjatë vitit të kaluar.
Por, cilat janë qytetet shembull me numrin më të vogël të aksidenteve dhe viktimave?
Aksidentet: Gjatë periudhës Janar-Dhjetor 2017, qytetet me numrin më të vogël të aksidenteve janë Dibra dhe Gjirokastra (36), për të vijuar më pas me Kukësin dhe Beratin (42).
Viktimat: Qytetet me numrin më të ulët të të vdekurve për shkak të aksidenteve gjatë gjithë 2017-ës, janë Dibra dhe Berati (1), për të vijuar më pas me Kukësin me 7 të vdekur gjatë vitit të kaluar.
Po ashtu, gjatë monitorimit të shifrave të publikuara nga INSTAT, vihet re një reduktim i ndjeshëm i aksidenteve të ndodhur në Shkodër, nga 2016-a në 2017-ë. Konkretisht, nëse nga 133 aksidente rrugore, në vitin 2017-të janë shënuar vetëm 48 aksidente, por pavarësisht kësaj duhet thënë se numri i viktimave nuk ka pasur ndonjë diferencë të madhe (nga 27 në 23).
Shkaku i aksidenteve:
Shkaku kryesor është sjellja e drejtuesit të mjetit (1608 raste gjatë 2017-ës), ndërsa një tjetër shkak është sjellja e këmbësorëve (370 raste).
Përgjithësisht, grupmosha e re 25-35 vjeç kanë kryer numrin më të madh të aksidenteve, për të vijuar me grupmoshën 16-25 vjeç. TIRANA TODAY
