Dita e sotme nisi me një sherr mes dy ortakëve të një firme ndërtimi, ku njëri nga ata mbeti i plagosur dhe tjetri është arratisur.
Sherri i ndodhur mes tyre ka bërë që afati përfundimit të objektit në ndërtim të shtyhet. Kjo shtyrje ka zemëruar banorët e pallatit, që kanë blerë hyrje te pallati që po ndërtohet.
Jemine Durishti, pronare e një pjesë të tokës ku është ndërtuar pallati, ka thënë për “Abc News” se biznesmenët kanë për t’i dhënë 4800 euro.
Ajo gjithashtu shtoi se dy biznesmenët i kanë shitur hyrjet nga dy ose tre herë, dhe se Albert Allmuça nga i cili ajo pret pagesën, është i “mbytur” në borxhe.
“Kam 4.800 euro për të marrë. Kam tre muaj që vij e ai mshifet. Më thotë do t’i jap, se jam gjysh, se do marr kredi, unë i du se do shtrohem në spital. Me Bertin (Albert Allmuça) e kam konfliktin.
Kushedi sa njerëzve u ka marrë lekët dhe s’ua ka dhënë. Të gjithë, i ka shit nga tre herë një hyrje. Është mbyt në borxhe. Kushedi sa borxhe ka për të dhënë. Nuk kam fuqi për të shkuar në polici, jam e sëmurë”, ishin fjalët e Jemine Durishtit.
