Reperi Rigels Rajku, i njohur me emrin e artit si Noizy, është dënuar me dy mijë euro gjobë, lidhur me incidentin ku ai mbeti i plagosur në qendër të Prishtinës. Në procesin gjyqësor, i cili ka përfunduar sot, Albert Krasniqi, personi i akuzuar për plagosjen e Noizyt, është dënuar me 6 muaj burgim, me mundësinë që dënimin ta shlyejë me para. Vendimi i gjykatës i shpallur sot, i ngarkon Krasniqit edhe një dënim shtesë prej 8 mijë eurosh, për veprat e tjera në akt-akuzë.
Shpallja e gjykimit është bërë në një seancë ku dy të akuzuarit nuk kanë marrë pjesë. Beteja në mes dy ‘label’-ëve muzikorë OTR e BabaStars e cila nisi më 13 shtator të vitit 2016 , para hotelit “Swiss Diamond”, është zhvendosur në Gjykatë. OTR është ‘label’ në të cilin bën pjesë ‘Noizy’, ndërsa ‘BabaStars’ label-i tjetër ku bën pjesë ‘Cozman’.
Mediat rozë raportojnë se konflikti disa-vjeçar mes Albert Krasniqit dhe Noizyt, është mbyllur të hënën në gjykatë, ku shpallën pajtimin.
Pasi janë mbushur dy vjet nga përleshja e armatosur në të cilën kishte mbetur i plagosur lideri i labelit OTR, Rigels Rajku (Noizy) me Albert Krasniqin, palët u përballen në gjykatë.
Noizy është shprehur se ndihet fajtor, dhe se të kaluarën kanë vendosur që ta lënë prapa.
“Akuzën e pranoj. E kuptoj shumë mirë. Unë ndihem me të vërtetë fajtor. Nuk e di a do të më pranohet kjo, por kërkoj falje, kjo ka ndodhë, ne jemi të rinj dhe ne e kemi falë njëri-tjetrin. Kemi vendosë që të kaluarën ta lëmë prapa. Jemi takuar edhe me familjen e Albertit, dhe me familjen time, kemi vendosur që këto t’i lëmë prapa”, citohet të ketë thënë Noizy, para gjykatës.
Po kështu, fajësinë e pranoi edhe Albert Krasniqi: “Po e pranoj fajësinë dhe ndjehem shumë keq për rastin që ka ndodhë. Ne jemi pajtuar, dhe tash jemi miq”.
