Një 27-vjeçar mori dje dy plumba në këmbë, pas një sherri për gërvishtjen e makinës. Ngjarja, fatmirësisht pa viktima ndodhi rreth orës 11:05, në afërsi të tregut të qytetit, ndërsa i lënduar ka mbetur Saimir Nikolla, banues në Ishull Lezhë.
Në momentin e ngjarjes, në zonën përreth ka pasur shumë lëvizje, duke qenë se aty pranë ndodhet edhe tregu, por fatmirësisht nga të shtënat nuk pati të tjerë të lënduar. Krimi ka ndodhur rreth 700 metra larg Drejtorisë së Policisë.
Dyshime e para
Nga hetimet paraprake të policisë, ngjarja dyshohet të ketë ndodhur pas një konflikti të çastit, për gërvishtjen e makinës. Në bazë të rindërtimit të ngjarjes, dyshohet se 27-vjeçari dhe autori janë shkëmbyer me automjetet e tyre, dhe pas fërkimit, ka lindur një debat. Kjo gjë ka çuar deri në shkrehjen e armës së zjarrit, pasi Saimir Nikolla u qëllua dy herë në këmbë, raporton ‘Panorama”. Por nga ana tjetër, grupi hetimor nuk përjashton mundësinë që mes dy të rinjve të ketë pasur ndonjë konflikt të mëparshëm. Nga verifikimet e kryera nga ana e uniformave blu, i plagosuri nuk rezulton të jetë person me precedent penal.
Identifikohet autori
Për kapjen e autorit janë ngritur pika kontrolli, dhe po hetohet në lidhje me zbardhjen e plotë të kësaj ngjarje. Gjithashtu janë shoqëruar në komisariat disa persona, të cilët po merren në pyetje rreth ngjarjes.
