Zv.ministrja e Shëndetësisë, njëherësh drejtuesja e komitetit të ekspertëve, Mira Rakacolli, ka paralajmëruar qytetarët se jemi shumë pranë vijës së kuqe. Nëse do të ketë masa shtesë kufizuese, ajo tha se kjo do të vijë pasi të analizohen të gjitha faktorët.
Teksa ishte e ftuar në rubrikën “Opinion” në studion e lajmeve në News 24, Rakacolli deklaroi se duke iu referuar shifrave në rritje të infektimeve, ekspertët do të detyrohen të propozojnë masa shtrënguese, pa i specifikuar ato. Edhe një herë tjetër, ajo ka nënvizuar se mbyllja varet nga vetë ne. Nëse bashkërisht respektojmë masat, në këtë formë mund ta mundim këtë virus.
“Shifrat jepen çdo ditë, njerëzit i ndjekin. Dje shënuam një numër rekord të të infektuarve, ashtu si edhe numri i të shtruarve në spitale. Kjo është një situatë e parashikuar. Kjo po ndodh në mbarë globin.
Është një ecuri normale e epidemisë. Numrat janë në rritje, fatmirësisht jo me atë shpejtësi si në Itali, Francë e Spanjë, por kjo tendenca e rritjes vazhdon të na bëjë të jemi të kujdesshëm për marrjen e masave.
Mbyllja varet nga vetë ne. Ne duhet të jemi të gjithë bashkë, vetëm ashtu mund ta mundim këtë virus.
E vetmja mënyrë për ta frenuar Covid është parandalimi. Ashtu siç u propozua që universitetet të funksionojnë on line, ashtu po vlerësojmë në dinamikë edhe masa të tjera. Masat s’kanë lidhje me çfarë kanë bërë vendet e tjera, duhet menduar globalisht dhe vepruar lokalisht.
Duke parë situatën tonë, propozojmë edhe masa të tjera që mund të jenë kufizuese. Jemi shumë pranë vijës së kuqe! Nuk ka gjë të prerë. Askush nuk e thotë tani se çfarë veprimi do ndërmerret, do analizohen të gjitha faktorët”, tha Rakacolli.
Referuar zërave se nuk ka më vende në spitale, Rakacolli tha se ato nuk janë ezauruar komplet.
“Jo, nuk janë ezauruar komplet. Kemi 550 shtretër vetëm për covid në Tiranë. Ne duam të bëjmë një menaxhim sa më të mirë të kapaciteve, ndaj edhe e bëjmë hapjen e spitaleve me plan. Kur të mbushet i treti, shpresojmë që jo, hapet i katërti”, vijoi më tej ajo.
