Rusia ka regjistruar bilancin më të rëndë të sajin që nga shpërthimi i koronavirusit në vend.
Mësohet se në 24 orët e fundit, janë shënuar 48 viktima dhe 6,060 raste të reja. Të dyja shifrat janë më të lartat që ka raportuar ndonjëherë Rusia.
Numri total i viktimave në Rusi shkon kështu në 361. Por ekspertët shëndetësorë besojnë se kjo shifër nuk është e saktë, duke thënë se numri i të vdekurve është më i lartë.
Ndërsa numri total i personave të infektuar ka shkuar në 42,853. Rusia ia kalon kështu edhe Belgjikës e cila renditej e dhjeta në botë për numrin më të madh të të infektuarve.
Rritja e vazhdueshme e numrit të rasteve me COVID-19 po ndodh pavarësisht masave të hershme dhe të rrepta të qeverisë për luftimin e përhapjes së virusit. Rusia e ka marrë vendimin për mbylljen e pjesës më të madhe të kufirit me Kinën, përpara shteteve të Evropës.
Kryetari i Moskës, i cili ka qenë në vijën e frontit të luftës kundër koronavirusit, javën e kaluar paralajmëroi se vendi është vetëm në fillimin e rritjes së rasteve.
Deri më tani në Rusi raportohet të jenë shëruar 3,291 persona. Numri i rasteve ende aktive është 39,201 ndërsa 8 persona ndodhen në gjendje të rëndë shëndetësore.
Worldometer e rendit tashmë Rusinë në mesin e 10 vendeve më të prekura në botë, bashkë me SHBA, Italinë, Spanjën, Francën, Gjermaninë, Mbretërinë e Bashkuar, Kinën, Iranin, dhe Turqinë.
