Kryetari i Lëvizjes Vetëvendosje, Albin Kurti,e cilëson si një gabim idenë e Shengenit Ballkanik.
Në një intervistë për Report Tv, Kurti tha se takimi në Ohër mes disa prej liderëve në Ballkan, nuk duhej të mbahej. Sipas tij, në momentin që dihej se Kosova nuk do ishte e pranishme në takim, ky i fundit duhej të spostohej.
“Vala e dytë e këtyre iniciativave rajonale nuk është dashur të mbahet. U mbajt takimi i parë në Novi Sad, u tha që në Ohër do të vijnë të gjithë dhe së pari aty nuk shkoi Kosova, së dyti Mali i Zi dhe Bosnja e Hercegovina patën përfaqësim simbolik dhe besoj që në kohën kur spostohet edhe Samiti i Parisit nuk ka pse të mos spostohet për një datë tjetër edhe ky i Ohrit. Pra për mua ishte e gabueshme dhe pashpjegueshme ngutia që medoemos, tani, të mbahet kjo mbledhje në Ohër në kohën kur dihej që Kosova nuk do të marrë pjesë”, tha Kurti.
