Rëndohet bilanci në Miami të Shteteve të Bashkuara të Amerikës, teksa deri më tani janë konfirmuar 4 viktima nga shembja e një ndërtese 12-katëshe. Lajmi i trishtë u bë i ditur nga kryebashkiakja Daniella Levine, teksa shtoi se 159 persona janë të pagjetur shkruan ABC7 Chicago.
Që prej ditës së djeshme, kur ndodhi ngjarja e rëndë, ekipet e shpëtimit vazhdojnë të bëjnë kërkime nëpër rrënoja me shpresën e mundshme për të gjetur të mbijetuar.
Ekipet nxorën një nënë dhe fëmijën e saj, pasi u detyruan t’i presin gruas këmbën, tha shefi i shërbimeve emergjente për Majamin. Specialistët po përpiqen të futen në ndërtesë nga një garazh i nëndheshëm. Ndërtesa 12-katëshe, rreth 6 milje në veri të Miami Beach, u shemb rreth orës 1:03 të së enjtes. Zyrtarët thanë se shembja preku 55 nga 136 njësitë e ndërtesës.
Autoritetet nuk kanë bërë zyrtare shkakun e shembjes. Mësohet se në tarracën e ndërtesës po bëheshin punime, por zyrtarët thonë se nuk shohin mundësi që këto punime të kenë shkaktuar shembjen.
Presidenti Joe Biden, miratoi shpalljen e gjendjes emergjente në shtetin e Floridës dhe urdhëroi ndihmë federale për të përforcuar përpjekjet e autoriteteve shtetërore dhe atyre lokale në tejkalimin e kësaj situate.
