Në Shijak ka nisur shembja e 18 pallateve në zonën e Luginës, një nga më të prekurat nga tërmi i 26 nëntorit. Në total priten të shemben 30 pallate, 18 prej tyre në zonën e Luginës. Shembja e banesave është bërë me fadroma, dhe jo me shpërthim të kontrolluar.
Në Shijak ka qenë i pranishëm edhe kryeministri Edi Rama, i cili ka bërë një inspektim të punimeve në fjalë. Rama tha se pritet të ringrihet një lagje e re, me godina të standardeve më të mira për jetesën. Po kështu, me shkolla të reja e shërbime të një niveli tjetër.
Kryeministri tha ndër të tjera se Shijaku ka qenë i shkëputur nga sezoni turistik, por me këtë transformim do të bëhet një pikë e turizmit të zonës.
“Jam shumë i kënaqur, se Shijaku pati një goditje të fortë. Të gjithë këto godina u bën të pabanueshme. Kryetari i Bashkisë dhe Ministri i Rindërtimit, me grupin e arkitektëve kanë bërë një punë fantastike. Një lagje krejt e re. Me godina të standardeve më të mira për jetesën.
Me shkolla të reja e shërbime të një niveli tjetër. Edhe ata që kanë pasur dyqane e pika të ndryshme shërbimesh. Shijaku ka qenë i shkëputur nga sezoni turistik, por me këtë transformim do të bëhet një pikë e turizmit të zonës. Dhënia me qira e hapësirave gjatë sezonit”, tha kryeministri Rama.
