Ish-deputeti Dashamir Shehi, teksa ishte i ftuar në “RtvOra”, u shpreh se nëse Shqipëria nuk merr ditën e nesërme një përgjigje pozitive për hapjen e negociatave, kryeministri Rama duhet të lidhë atletet dhe të largohet.
“Ky që është në qeveri, puna e parë duhet të lidhë ato atletet e bardha dhe të largohet. Ky është reflektimi, mesazhi dhe sinjali”, deklaroi Shehi.
Nga ana tjetër, ish-deputeti ka komentuar edhe deklaratën e shefit të qeverisë, i cili tha se dielli do të lindë sërish edhe nëse Franca nuk pranon të thotë “PO”. Lidhur me këtë, Shehi u shpreh se për kryeministrin dielli lind gjithmonë te shtëpia e tij.
“Për Ramën lind dielli dhe lind gjithmonë te shtëpia e tij. Situatë më të rëndë Shqipëria e këtyre 30 vjetëve ti prehet shpresa pothuajse definitive, ka një problem të madh nëse na përzënë dhe këtë radhë. Europa po përgatit një strategji të re për zgjerimin sipas modelit francez, të thellojmë bashkëpunimin këto që jemi.
Të bëjmë një Europë politike dhe pastaj të zgjerohemi, i bie që kjo punë të shkojë pas 10 vite, një histori shumë e gjatë dhe e trishtueshme për Shqipërinë. Është sinjal shumë i rëndë dhe i keq, pa një përmbysje të madhe nuk mund të ringrihet shpresa për Shqipërinë”, tha Dashamir Shehi.
