Basha ka përfunduar takimin me aleatët, lidhur me aksionin e mëtejshëm të opozitës. Në një prononcim për mediat, kreu i LZHK-së, Dashamir Shehi, tha se opozita do të vijojë me rezistencë më të madhe gjatë kësaj jave, ndërsa shtoi se nuk do t’i njohin zgjedhjet.
Pak më herët, Kolegji Zgjedhor shpalli verdiktin e tij në lidhje me kërkesën e Partisë Uniteti Kombëtar, përfaqësuar nga kryetari Idajet Beqiri, për çregjistrimin nga zgjedhjet. Kolegji Zgjedhor ka lënë në fuqi vendimin e KQZ për të mos çregjistruar partinë, e duke lënë kështu në fuqi 30 qershorin. Lidhur me këtë fakt, Dashamir Shehi e cilësoi Kolegjin si një fantazmë.
“Këto nuk janë zgjedhje, ne nuk i njohim. Ne do ndjekim dekretin e presidentit. Kolegji nuk ka marrë ndonjë vendim, Kolegji është një fantazmë në këtë mes, janë disa fatkeqë që i ka rënë rasti të marrin disa vendime të vështira për veten e vetë.
Ne do të shkojmë të përballemi në çdo cep të Shqipërisë me këtë juntë të re politike. Ne këto zgjedhje nuk i njohim, më 30 qershor nuk do të ketë votime. Rrezikshmëria e këtij grupi është aq e madhe, saqë justifikon çdo lloj rezistence.
Rezistenca jonë do të jetë edhe më e madhe gjatë kësaj jave”, tha Shehi.
Pas vendimit të Kolegjit Zgjedhor dhënë ditën e sotme, Presidenca bëri lëvizjen e radhës. Nesër në orën 08:00, do të ketë një konferencë për mediat në ambjentet e institucionit të Presidentit.
