Kreu i LZHK-së, Dashamir Shehi vlerëson pozitivisht rolin e presidentit, Ilir Meta, në tentativat e tij për t’i dhënë fund krizës politike, por se opozita nuk mund të shkojë në zgjedhjet e dekretuara më datë 13 tetor.
Në një prononcim për BalkanWeb, Shehi sqaron se opozita nuk mund të shkojë në zgjedhje pasi beteja e saj nuk ishte për të fituar disa muaj kohë, por për të larguar Ramën nga pushteti me zgjedhje të lira e të ndershme.
I pyetur në lidhje me djegien e mandateve, Shehi tha se ky akt i opozitës pati anët e veta pozitive dhe negative, teksa shton se kostot e krizës politike që po zgjat prej muajsh sipas Shehit, po i paguan Shqipëria.
Sa i përket zgjidhjes së kësaj krize politike, ai përsëriti se e vetmja alternativë mbetet një qeveri tranzitore me njerëz të ndershëm nga të dyja kampet, që do të mundësojë zgjedhje të lira e të ndershme.
Shehi paralajmëroi e opozita do të vijojë me protesta mbarë popullore, denoncime të vazhdueshme të elementeve kriminal në PS si dhe në dhënien e alternativës së re për shqiptarët.
