Kandidati për kryetar i Partisë Demokratike, Agron Shehaj i ka bërë thirrje demokratëve që të dalin dhe të votojnë më 13 qershor, për kreun e ri të kësaj force politike.
Shehaj u shpreh, se demokratët duhet të votojnë ndryshimin, që Partia Demokratike të kthehet në një parti që fiton.
Postimi i Shehaj në rrjetin social, Facebook
Të dashur demokratë,
Secili nga ju, nëse keni kartë anëtarësie apo jeni në listën e votuesve të partisë, ka të drejtë të votojë ditën e dielë.
Askush, asnjë komisioner dhe asnjë komision, nuk ka pushtetin t’ju heqë të drejtën e votës ditën e dielë, sepse këtë të drejtë ua jep Statuti i partisë.
Koha kur mund t’ju quanin armik, t’ju përjashtonin apo t’ju hiqnin votën për mendimet tuaja ndaj udhëheqësit e partisë, vdiq ditën që lindi Partia Demokratike.
Mos rrini, dilni në votim. Votoni ndryshimin, që ta kthejmë Partinë Demokratike në ditët e saj të mëdha, në ditët kur ajo ishte #PartiaQëFiton.
Më 13 qershor do të mbahen zgjedhjet për kryetarin e Partisë Demokratike. Për postin e kryetarit kandidojnë Lulzim Basha, Fatbardh Kadilli, Agron Shehaj dhe Edith Harxhi.
