Deputeti demokrat Agron Shehaj, i ftuar një emisionin ‘Top Talk’, duke folur për klasën politike me termat e korrupsionit, solli në fokus rastin e një ministri, i cili ka rrogën 2 milionë lekë, e lëviz me makinën 200 mijë euro.
“Nëse një ministër që ka rrogën 2 milion lekë, s’ka të ardhura të tjera e del me një makinë 200 mijë euro, unë nuk kam nevojë ta provoj, më mjafton dyshimi. Ai është i korruptuar. Unë kështu mendoj”, deklaroi deputeti Agron Shehaj.
Deputeti i Partisë Demokratike, tha ndër të tjera se platforma e propozuar nga Basha, i prek të gjitha qeveritë. “Lulzim Basha ka propozuar një platformë për çlirimin e ekonomisë, e cila prek të gjitha qeveritë, madje në listë është përfshirë edhe një koncension dhënë gjatë qeverisjes së PD.
Fakti që ka pasur apo jo përpara, nuk do të thotë asgjë sepse do verifikohen të gjitha. Është e rëndësishme që të mos kërkohet justifikimi i vjedhjeve të tanishme, me të gjitha edhe me trafikun e drogës, me argumentin që dëgjoj që është qesharak kur thuhet se çfarë problemi ka krimi në Shqipëri, apo lidhja e krimit me politikën, kur këto kanë ndodhur gjithmonë.
Ky nuk është argument. Nëse një kompani krijohet 2 ditë para dhe më pas merr koncension, këtu kemi të bëjmë me një fakt. Nëse Vilma Nushi merr një koncension prej 70 milionë eurosh në një fushë ku nuk ka asnjë eksperiencë, kur duhet se ka qenë mbështetëse e PS, nuk ke nevojë ta provosh. Një koncesion pa asnjë vlerë që është marrë pa asnjë lloj gare”, tha Shehaj.
Deputeti demokrat nënvizoi se duhet bërë një vlerësim se si ishte Shqipëria kur erdhi Rama në pushtet, dhe si është sot, që sipas tij, të gjithë treguesit janë përkeqësuar. Ai mori rastin e shqiptarëve të cilët kanë dëshirë për të ikur nga vendi. Deputeti dha përmes fakteve se në 2013 kishte 140 mijë shqiptarë që aplikonin lotarinë amerikane, ndërsa vitin e kaluar ishin 400 mijë.
“Duhet të gjykojmë se si ishte vendi kur Rama erdhi në pushtet, dhe të shohim se si është Shqipëria sot. Të gjithë treguesit janë përkeqësuar. Marrim rastin e dëshirës së shqiptarëve për të ikur nga vendi, si treguesin kryesor të qeverisjes. Në 2013 kishte 140 mijë shqiptarë që aplikonin lotarinë amerikane, ndërsa vitin e kaluar ishin 400 mijë. Ky është një fakt”, theksoi Shehaj.
