Luca Pappagallo, i cili është një shef i njohur italian me gati 400 mijë ndjekës në Youtube, në një lidhje me Skype për “ABC e Mëngjesit”, ka treguar se ai gatuan edhe disa receta shqiptare. Këto receta të shijshme si tava e dheut apo turlija ia ka mësuar një vajzë shqiptare. Ndër të tjera ai tha se nuk ka ardhur asnjëherë në vendin tonë, dhe do të kishte shumë dëshirë që t’i provonte këto pjata se si gatuhen në variantin origjinal.
“Pjata e parë shqiptare që kam gatuar është tava e dheut që ma tregoi një vajzë shqiptare. Nga ai moment kam shtuar në librin tim tre pjata, kam gatuar biskota me origjinë turke, gurabije më duket quhen, edhe turli kam gatuar.
Në kuzhinën shqiptare ka një lloj influencimi si shumë kultura të tjera. Kombinimi i shijeve mes të ëmblës dhe të kripurës janë fantastike.
Nga ana ime shtoj shumë pak në receta, vajza shqiptare që më ndjek nuk është shumë e sigurt. Ajo i telefon një zonje nga Elbasani dhe i thotë nëse nuk e kemi këtë produkt me kë mund ta zëvendësoj.
Ajo i gatuan këto recetat bashkë me mua dhe më thotë shto më shumë djath, ose diçka tjetër, pasi janë receta që unë nuk i kam provuar më parë. Unë nuk kam ardhur asnjëherë në Shqipëri. Dua të vij që t’i provoj se si gatuhen”, tha Luca.
