Shefi ekzekutiv i Modernas, Stephane Bancel deklaroi se vaksina kundër Covid-19 e prodhuar nga kjo kompani, mund të ofrojë mbrojtje deri në 2 vjet, edhe pse më shumë të dhëna duhen akoma për të bërë një vlerësim përfundimtar.
Kompania e bioteknologjisë amerikane, e cila tronditi botën vitin e kaluar duke dalë me një vaksinë kundër sëmundjes së shkaktuar nga koronavirusi në vetëm disa javë, mori miratimin për përdorim nga Komisioni Evropian të Mërkurën, shkruan Reuters.
Duke pasur parasysh faktin se zhvillimi i vaksinave zakonisht kërkon vite, kohëzgjatja e mbrojtjes së vaksinave për COVID-19 është një çështje e diskutueshme për shkencëtarët dhe rregullatorët.
“Skenari i makthit që u përshkrua në media në pranverë me një vaksinë që punon vetëm një ose dy muaj, mendoj se i ka ardhur fundi”, tha Bancel.
Bancel shtoi se kompania e tij ishte gati të provonte se vaksina e saj do të ishte gjithashtu efektive kundër varianteve të koronavirusit të parë në Britani dhe Afrikën e Jugut.
Shkencëtarët kanë thënë se vaksinat e sapo zhvilluara duhet të jenë po aq efektive ndaj të dy varianteve të Covid-19.
