Ambasada Amerikane në Tiranë, teksa ka kërkuar maturi dhe vetëndërgjegjësim nga ana e qytetarëve lidhur me pandeminë, po kështu jep mesazhe të forta për sistemin e drejtësisë.
Në postimin e shpërndarë në Facebook, thuhet se SHBA kanë mbështetur reformën në drejtësi prej fillimit, dhe do vijojnë të mbështesin zbatimin e saj.
Teksa ndodhemi në izolim, shumë institucione i janë përshtatur situatës së re me koronavirusin vdekjeprurës. Ambasada citon më tej se mbështesin punën që po bëjnë anëtarët e Këshillit të Lartë të Prokurorisë, teksa punojnë nga shtëpia.
Njoftimi
Ambasada Amerikane në Tiranë nxit me forcë distancimin social, por kjo nuk do të thotë se sistemi i drejtësisë duhet të ndalojë së punuari. Ne kemi mbështetur reformën në drejtësi prej fillimit dhe vazhdojmë të mbështesim zbatimin e saj, jo vetëm në ekspertizë ligjore por edhe në mbështetje logjistike. Gjatë këtyre ditëve të vështira, jemi të kënaqur të shohim anëtarët e Këshillit të Lartë të Prokurorisë teksa punojnë nga shtëpia. Kompjuterët e tyre portativë ishin pjesë e një dhurimi nga zyra e OPDAT e Ambasadës së Shteteve të Bashkuara për Këshillin e Lartë të Prokurorisë. Drejtësia e vërtetë nuk ndalet kurrë! #SHBAQendronKrahShqiperise
