Shtetet e Bashkuara të Amerikës kërkojnë që Serbia të njohë shtetin e Kosovës. Zëvendës ndihmës sekretari amerikan i shtetit, Matthew Palmer e bëri këtë deklaratë gjatë një paneli dedikuar Evropës Juglindore në Forumin Ekonomik Delphi që po mbahet në Greqi.
“Serbia duhet ta njohë Kosovën si shtet të pavarur dhe sovran, dhe të njëjtën duhet ta bëjë edhe Kosova”, ndërsa ka shtuar se ekziston një keqkuptim rreth pozicionit amerikan.
“SHBA-ja dëshiron të ndihmojë në atë çfarë palët në dialog dëshirojnë të bëjnë. Marrëveshja e Prespës ishte e suksesshme sepse krerët e të dyja palëve e donin atë. Ne duam që kjo të përsëritet në negociatat midis Serbisë dhe Kosovës, dhe Beogradi e Prishtina të pranojnë marrëveshjen. Nuk ka linja të kuqe, por nuk ka as fatura blanko”, tha Palmer, i cili kërkoi po ashtu heqjen e taksës nga Kosova.
“Kosova duhet ta heqë ose pezullojë taksën, sepse ajo është pengesë për avancim në bisedime”.
Ai përkujtoi se Shtetet e Bashkuara ndër vite e mbështesin Kosovën dhe tani është e nevojshme që Kosova të përgjigjet si partnere.
“SHBA dëshiron të ndryshojnë kontekstin në të cilin do të merret vendimi dhe kjo është arsyeja pse ata duan të hiqet taksa”, u shpreh Palmer.
Në Forumin Ekonomik, përveç Kosovës, u fol edhe rreth kërcënimeve dhe rreziqeve të stabilitetit në Ballkan.
