Ndërkombëtarët nuk heqin dorë nga Shqipëria. Ata tregohen të angazhuar për të zgjidhur krizën politike në Shqipëri. Me sa duket zgjidhja pritet që të vijë nga SHBA dhe BE.
Eurodeputeti Knut Fleckenstein dhe senatori John McCain janë të shqetësuar se çfarë po ndodh këtu ndaj janë duke bërë një tjetër apel për faktorin politik shqiptare.
Tani jemi në kushtet kur opozita e ka bërë të qartë tashmë vendimin për të mos marrë pjesë në zgjedhjet parlamentare të 18 qershorit, në rast se kryeministri Rama nuk pranon kushtin për t’i hapur rrugën krijimit të një qeverie teknike pa të në krye.
Fleckenstein dhe McCain nuk janë të vetmit që shprehin shqetësimin e tyre. SHBA-të e kanë marrë seriozisht rolin e negociatorit për të zgjidhur krizën politike në Shqipëri pas thirrjeve të McCain për ti kthyer sytë nga Ballkani.
Javën që vjen në Tiranë pritet të mbërrijë zv/ndihmës sekretari amerikan i Shtetit, Hoyt Brian Yee.
Yee, do të zhvillojë takime me liderët kryesore politike, në përpjekjen për arritjen e një marrëveshje mes opozitës dhe mazhorancës.
Mësohet se zëvendësndihmës sekretarit i shtetit do të takojë kryeministrin Rama, presidentin e zgjedhur Ilir Meta dhe kreun e PD Lulzim Basha.
Kjo vizite vjen pas dështimit të negociatorit të Partisë Popullore Europiane David McAllister.
