Kreu i Shtetit, Ilir Meta, ka reaguar në lidhje me mesazhet shantazhuese dhe kërcënuese ndaj gazetares së “Ora News”, Beti Njuma. Ai ka shprehur solidaritetin me gazetarët, që janë në presion për shkak të raportimeve.
Me anë të një postimi në Facebook, Meta ka kërkuar nga ana e gazetarëve që të mos dorëzohen përballë presioneve dhe shantazheve të qeverisë, dhe pronarëve të tyre.
Sipas tij, kjo është e vetmja mënyrë që të themelohet një media transparente. Meta thotë se është koha për përmbysjen e këtij regjimi, që sipas tij, turpëron çdo njeri me minimum dinjiteti.
Si president, por edhe si qytetar, ai nënvizon se është me gazetaren Beti Njuma dhe familjen e saj të lënduar nga ‘rrugaçëria e një pushteti të pacipë dhe brutal, por edhe me të gjithë kolegët e saj të cilët shantazhohen çdo moment’.
Statusi
Dua sot të shpreh solidaritetin më të fortë me të gjithë gazetarët që janë në një presion brutal nga të gjitha drejtimet për shkak të tmerrit nga raportimi i të vërtetave të tyre në publik.
Tmerri nga fjala e lirë dhe pasqyrimi i së vërtetës është tipari kryesor i regjimeve kriminale që nuk e bazojnë qeverisjen mbi votën e lirë dhe fjalën e lirë, por në mbajtjen të shtypur dhe të frikësuar të popullit të tyre.
Asgjë nuk e ndal Ndryshimin!
Madje koha e Ndryshimit ka kaluar prej 4 vitesh.
Tani ka ardhur Kohë tjetër!
Ju lutem gazetarëve të më njoftojnë që kur të gjithë pronarët e tyre të dorëzohen para presioneve të pushtetit, të themelojmë së bashku një media transparente që ta nisë Kohën e Re me Përmbysjen e këtij regjimi të neveritshëm mediatik që turpëron çdo njeri me minimum dinjiteti.
Mos u dorëzoni para presioneve të pushtetit dhe pronarëve!
Kujtoni poezinë e Havzi Nelës dhe do i qëndroni misionit tuaj fisnik në shërbim të të vërtetave dhe popullit shqiptar që meriton të rimarrë në dorë fatet e Tij.
Si President, por edhe si qytetar, jam sot me gazetaren Beti Njuma dhe familjen e saj të lënduar nga rrugaçëria e një pushteti të pacipë dhe brutal, por edhe me të gjithë kolegët e saj të cilët shantazhohen çdo moment.
Çdo shqiptar që do një media në shërbim të së vërtetës do jetë aksioner!
Dhe Bordi Drejtues do jetë i përbërë vetëm nga gazetarë kurajozë të cilët janë shantazhuar, kërcënuar dhe lënë pa punë nga regjimi.
