Opozita dhe mazhoranca pritet të ulen edhe sot në tryezë në orën 10:00, për të biseduar në Kryesinë e Kuvendit, në prani të kamerave. Kjo mori dakordësinë mes Enkelejd Alibeaj dhe grupit negociator socialist Taulant Balla, Damian Gjiknuri dhe Elisa Spiropali. Raundi i parë dështoi pa asnjë emër të propozuar, mirëpo pritet që sot në tryezë të hidhen kandidatët e mundshëm për postin e Kryetarit të Shtetit. Kreu i grupit Parlamentar të PS-Së, Taulant Balla ftoi Alibeajn dhe opozitën që të propozojë një emër për Presidentin nëse i ka 20 firma, ndërkohë që tha se mazhoranca pret gatishmëri nga opozita për të vijuar me procesin për Presidentin. “Unë kam shprehur gatishmërinë për të diskutuar mbi dokumentin e Alibeajt, por natyrshëm që të drejtën e propozimit ta kenë të gjitha palët”, deklaroi Balla. Ndërkohë që nga ana e tij, kryetari i grupit parlamentar të PD-Së, Alibeaj theksoi se për çështjen e Presidentit, transparenca është ilaçi kundër pazareve. “Unë kam durimin që t’i diskutojmë të gjithë hap pas hapi, e kuptoj shpejtësinë që do Balla, por besoj që Kushtetuta thotë një gjë, që tre raundet e para duhet shumica e cilësuar. Ne kemi pacaktuar rregullat, pastaj emrat”, deklaroi Alibeaj.
Raundi i dytë për zgjedhjen e Presidentit do të jetë në datën 23 maj ora 18:00. Vendimi u mor në mbledhjen e djeshme të Konferencës së Kryetarëve, ku nuk munguan akuzat. “23 maj në orën 18:00, më fundor nuk ka, besoj që ky është propozim që të gjithë bien dakord”, deklaroi Balla.
